Author

नीती बडवे | Neeti Badwe

प्राध्यापक डॉ. नीती बडवे यांनी सावित्रीबाई फुले पुणे विद्यापीठात पदव्युत्तर विभागात जर्मन साहित्य, भाषाशास्त्र, तसंच भाषा आणि साहित्यविषयक विचारप्रणाली याचं अध्यापन केलं.
त्यांनी मराठी, इंग्रजी आणि जर्मन ह्या भाषांमधे आणि ह्या भाषांमधून अनुवादही केले आहेत.
तसंच पीएच.डी.च्या संशोधन प्रकल्पांना आणि अनुवाद प्रकल्पांनाही मार्गदर्शन केलं आहे. त्यांनी 'जर्मन स्टडीज' विषयावरच्या आंतरराष्ट्रीय चर्चासत्रांमधे अनेक शोधनिबंध जर्मन भाषेत सादर केले आहेत. तसंच त्यांनी महाराष्ट्रातल्या स्त्रियांच्या गोष्टी जर्मन भाषेत लिहिल्या आहेत आणि ह्या पुस्तकाचं अनेक जर्मन विद्यापीठांमधे वाचन आणि सादरीकरणही केलं आहे.

डॉ. नीती बडवे यांनी अनेक वर्षं अ-मराठी आणि अ-भारतीय लोकांना मराठी आणि हिंदी ह्या भाषा शिकवल्या आणि त्यासाठी 'Learning Marathi as a Foreign Language' (Module 1 & 2) आणि 'Learning Hindi as a Foreign Language' ही पुस्तकंही लिहिली आहेत.

'निवडक काफ्का' हे त्यांचं थेट जर्मन मधून मराठीत अनुवादित केलेलं पुस्तक आहे. शिवाय महाराष्ट्रातल्या स्त्रियांच्या गोष्टींचं पुस्तक जर्मन बरोबर 'बिकट वाट' ह्या नावाने मराठीतही प्रसिद्ध झालं आहे. जर्मन भाषेमधे विकसित झालेल्या भाषाशास्त्रीय प्रणाली आणि परदेशी लोकांना मराठी शिकवताना आलेले अनुभव ह्यामुळे त्यांना मराठी भाषेकडे बघण्याचा एक नवीन दृष्टीकोन मिळाला. हे त्यांच्या अलीकडे प्रसिद्ध झालेल्या 'अनंत अक्षर' ह्या मालिकेतल्या तीन पुस्तकांतून दिसतं : 'भाषेकडे बघताना...', 'मराठी भाषेकडे बघताना...' आणि 'बहुभाषिकतेकडून भाषांतराकडे...' ही त्यांची विशेष महत्त्वाची पुस्तकं आहेत.

भाषा हा डॉ. नीती बडवे यांचा आत्मीयतेचा विषय आहे. जर्मन आणि मराठी ह्या दोन भाषा आणि संस्कृतींमधे त्या सातत्यानं मध्यस्थाचं काम करत आहेत.